28-3-2016 晨早回港

今朝八點幾機, 所以四點幾就要起身去機場。

去到機場俾我搵到個好正的位訓覺, 哈哈...

咁就玩咗五日。

27-3-2016 十分瀑布

今日起身見到落雨, 於是瞓多陣先起身。

今早去咗間叫做Louisa Cafe食早餐, 我好耐冇飲咖啡了, 嚟到台北冇可能唔飲囉。

搭台鐵去瑞芳, 不過見到架區間車會去猴硐, 咁冇理由唔落車探貓架。

每次去台北總要抽時間去猴硐, 太愛呢度了。

我哋都只係留咗大約45分鐘, 之後搭小火車去十分。

之前都去過九分菁硐猴硐但偏偏未去過十分, 今次去埋呢條小支線都應該冇乜特別地方想再去了。

一落車, 大家過火車軌。

過路軌

咁喺十分大家都會放天燈, 當列車駛離車站之後, 成條路軌都可以放天燈, 有車嚟時大家就散水, 好似泰國個鐵路市場呢。
 

 一疊疊天燈

 放天燈囉

咁我哋都有放天燈啦, 不過放完一次應該冇下次, 放完之後我諗諗下, D天燈放完唔會有人執架喎, 咁一堆垃圾喺山頭, 完全係破壞環境, 之後行去瀑布沿途都見到D爛天燈掛喺樹上, 所以, 其實真係唔應該放天燈的。

放完天燈就行去十分瀑布, 由火車站行大約三十分鐘, 可以租電單車, 但有點無謂因為架車都係唔可以入園區, 而且出入口都唔同位置, 租架車更麻煩。

去年年尾睇完伊瓜蘇, 其實對其他瀑布都唔係有太大期望, 除咗非洲個世界第一大瀑布之外, 我諗我都唔會再專登去睇瀑布了, 只係今次剛巧唔知做乜就去睇下啦。

其實都靚既, 而且又見到彩虹, 收貨啦。

跟住返火車站, 食少少野然後搭火車返台北, 其實經濟許可真係包車好D, 小火車真係逼到透唔到氣。

所以如果去十分其實真係好適合包車, 行唔係問題, 逼先係大問題。

返到台北, 去京站超市買手信, 然後返酒店附近間三多屋買外賣, 酒店職員介紹架喎。

又真係幾抵食既, 魚生好厚肉, 個櫻花蚊炒飯都好好味, 而且重有甜品同湯送, 好抵。

食飽抖一陣, 再出發去寧夏夜市食野。


今次又玩佢的小檔掉乒乓球, 好好玩喎, 哈哈...

食飽玩完返酒店執行李, 明早好早機呢。

26-3-2016 台灣賞櫻

今日非常好天, 一早起身我哋先去7-11買關東煮做早餐(我真係好鍾意食台灣7仔的關東煮), 然後搭捷運去淡水, 今日要去天元宮賞櫻。

去到淡水站, 一出站已經有天元宮櫻花專線, 好方便。

大約20分鐘車程就去到天元宮。

 天元宮外的反肚小狗

其實天元宮唔算好多櫻花啦,  不過我之前未見過粉紅色的櫻花, 呢度就有喇。

不過其實我哋去到時都已經過咗盛放期, 所以唔算非常靚。

好快就行完。

跟住搭返專車出淡水, 我哋沿住老街同海旁行下食下, 我終於搵到白灼魷魚喇。

不過今次食又係有點失望, 幾年前第一次食, 魷魚鮮甜, 今次好多沙, 食唔返以前的味道。

沿途遇見貓星人

行行下, 去到馬階醫院。

老實講我以前完全唔知呢段歷史, 我都只係吃喝玩樂好少留意當地歷史, 不過有機會都應該了解多D既。

馬階醫院內

馬階醫院旁教堂

睇完, 求其搵間舖頭食飯啦。

好味道。

食飽都好早, 唔知去邊, 咁買船飛過八里啦。

其實我都唔知八里有乜睇, 去到先算。

一落船向右行啦, 見到有一堆小店, 其中有一間買N年前的玩具同零食, 好開心喎, 我呢D老餅最鍾意。

好開心喎

我喺呢間小店都買咗幾個豬仔錢箱, 嘩哈哈.....

八里, 峇里, 哈哈...

 八里老街

好快又行完八里, 我覺得呢度有點似旗津, 但多人好多, 行完八里之後我哋搭返船過淡水, 買埋少少手信就返酒店抖一陣。

放低D野就出去食野, 今晚打邊爐, 上次食馬辣不錯, 今次試下食洛神賦。

馬辣多野食好多, 不過呢度環境靜好多, 種類不多但D野都新鮮。

食飽, 去附近的sogo行一陣睇野, 跟住返台北車站新光三越買手信, 再行下京站, 然後返酒店休息。

25-3-2016 落雨就去浸溫泉啦

其實今次台北之旅係冇plan過行程, 今朝起身見落雨, 咁決定去浸溫泉啦。

出發前先喺京站商場食個brunch先。

千揀萬揀竟然入咗去山頭火, 請問發生乜野事?

山頭火brunch

食飽飽, 跟住搭捷運去新北投浸溫泉。

新北投捷運站

其實我都唔知揀邊間, 不過諗住以前浸過春天都OK, 如果沿途搵唔啱咁最後去返春天浸囉。

由捷運一路行上去, 揀完又揀, 喺春天附近我哋見到間叫做倆人旅店, 不過可世得返地牢冇景觀房, 所以最後我都都係去返春天浸溫泉。

沿途景色

上次泡大眾湯, 今次泡私人湯屋, 600NT一個人一小時, OK啦。

對上一次浸溫泉係喺烏來, 烏來私人湯屋大好多。

浸咗一個鐘, 跟住落返山行去地熱谷。

食下溫泉蛋, 抖一陣又繼續行程。

路過溫泉博物館, 免入場費就入去睇下啦。

其實我一路都諗唔明新北投的泉水喺邊度嚟, 地熱谷咁細理論上唔夠用架, 咁就入博物館睇下有冇講喇。

不過都係話地熱谷係泉源。我估有地下水無限供應呱???

咁去博物館, 我哋去7-11食下關東煮, 然後搭捷運去圓山站。

網上話圓山站有個新的購物點叫做Maji Maji, 咁去睇下啦。

Maji Maji

好似真係冇乜特別, 於是我哋行一個圈又開喇。

出發前我喺香港網上訂咗書, 收到訊息話有得拎, 咁又去一轉永康街啦。上次去台灣個鰻魚飯太好食, 所以今次想食多次。

排長龍的葱油餅, 但太飽食唔落

上次食肥鰻屋, 今次見有另一間都話係鰻魚專門店, 咁不如試新野啦。

有點後悔, 冇上次嗰間咁好味呢...

跟住返酒店放低D書, 然後出去台北車站旁的新光三越睇下D手信的價錢, 返到酒店大約十點左右, 真係好健康。

24-3-2016 國泰航空係全宇宙最差的航空公司

復活動節假期去台灣的機票算係最平(但都係好貴), 所以去台北散下心。

下晝4點幾機出發, 我哋3點去到機場, print完boarding pass準備上機。

一上飛機我哋發現我哋個位被人坐咗, 於是我同空姐講, 空姐話 : 「架機就起飛, 你地有位就坐住先啦」。

以前去旅行都會有乘客調位的情況, 但通常係起飛後先換位, 但既然空姐咁講我哋問佢係咪可以佢話冇問題, 咁我哋就向前搵咗兩個空位坐低。

過咗一陣, 有個男人一家四口上機, 佢用英文講話個位係佢, 咁我同佢講我哋個位被人坐咗, 空姐叫我哋有位就坐低先, 當時另一個空姐同呢個男人的疑似老婆溝通, 最後佢地坐咗我哋後一行。

再過一陣, 有兩個人上機話個男人坐咗佢地個位, 呢個男人開始轉國語大鬧我哋, 話你哋香港人做的事好討厭, 你哋好乞人憎, 四圍都唔鍾意你哋, 你哋香港人好爛, 台灣唔歡迎你。

喂亞伯, 我都係跟空姐安排咁坐咋喎! 我同你解釋等空姐安排你喺度發癲, 而且你身邊有兩個可能係你個孫的細路, 你咁橫蠻無理既?

然後我發現, 有對香港夫婦同大陸夫婦分別亂咁坐, 於是攪到我哋個位被人坐咗, 但我非常不滿係點解空姐當時唔叫返呢兩對不守規則的夫婦坐返原位, 反而喺一班全滿的航班中叫我哋兩個有位坐住先? 點解我按你空姐的安排最後係被人指住嚟鬧? 自問過去多年去旅行從來唔會做D乞人憎的事, 連搭地鐵電話我都熄晒聲, 一定會按指示做, 影相唔用閃光燈唔影得相的地方唔會影相, 我想問點解我守規則反而會被人鬧?

最後我哋都係坐唔返自己個位!!!

我對國泰航空極度不滿, 寫呢篇blog時我已經寄咗投訴信, 但未收到回覆!!!

極度火滾之下去到呢個唔歡迎香港人的台灣!!!

今次住璞麗旅館。

在台北車站附近, 地點方便, 不過今日唔歡迎香港人的台北落大雨, 我哋放低行李拎住雨傘出去食晚飯。

我哋往寧夏夜市方向行, 去到一間叫做香蓮的鐵板燒, 食啦。

台灣食鐵板燒係幾平既。

食飽, 去寧夏夜市行一陣。

行咗一陣都返酒店了。