5-4-2016 學煮泰菜

今日訓到朝早8點就自然醒了。

訓醒之後去咗sailomjoy食野，我實在太掛住佢個芒果班㦸了！

質素保持到，實在太好了！

食飽，搭tuk tuk去tesco lotus行下超市買下野，本來諗住都會行一個早上，點知個零鐘就行完了。

先返酒店放低D野，跟住問下酒店職員邊度有芒果賣啦，佢話sompet market或者warorot都有，後者我上次去清邁時去過，所以就話不如去sompet market啦，不過都係先食晏先。

今次食返red chilli，幾好味，雖然價錢偏貴。

食飽飯，搭tuk tuk去sompet market，佢位置喺舊城區內，都算近我地酒店，咁短距離就被人呃咗50匹！

原來呢個market我上次嚟清邁學煮餸時都行過，不過我唔知佢叫咩名。

喺街市買咗好幾個芒果，質素唔錯，跟住我地見有時間就搭tuk tuk去埋warorot啦。

上次我行去warorot，只係去咗個外圍，返到香港我先知warorot market有一個三層高既建築，今次終於去到了。

呢度有好多手信賣，我買咗唔少乾果，呢度既龍眼乾真係好正，好過喺sunday walking street嗰度買嗰D。

買完野拎返酒店放低，然後出咗去附近餐廳飲野，呢度好得意，下晝2-5唔俾賣酒。

我地今晚報咗cooking class，飲完野就等車嚟接我地去上堂，今次得4個人學，近年去泰國都會報學煮餸，不過呢間係比較麻麻，好多菜式都係佢示範多。

另外兩個同學係加拿大人，我哋煮完飯返酒店時吹水啦，佢地問我地香港係咪想獨立，呢個問題其實真係問得好好，但好可惜我冇時間同佢詳談呢個話題啦。

返到酒店之後我地出咗去行個圈同飲杯野，跟住返酒店執行李，真係唔係好想返香港呢。

我從未試過買到咁瘋癲的...

4-4-2016 大象營

今日一早起身落樓下食早餐，跟住喺酒店等大象營的人嚟接我地。

今次選擇咗Baanchang Elephant Park，呢個大象營內的大象都係喺其他地方救返嚟，而佢的一日團會幫大象沖涼，同埋要學習下佢地的日常生活，每隻大象都有一個訓練員，訓練員都會生活喺園內。

 

 明明睇大象點解會有貓, 哈哈...

去到營內首先要換咗佢地的衫，然後就去餵下大象同D大象做下朋友咁啦，之後就會分開兩個人一隻大象，學下點騎大象冋點控制大象。個導遊其實都講解得好仔細，所以都幾好玩。

我地一共學咗四個commands。
no long=sit
kwei=turn left/right
how=stop
bai=go

呢四句都幾重要，特別係要叫佢停。

學完之後就去食晏，都係食下泰國河粉啦，食飽就開始騎大象沿營內行一圈喇。

最後就會同班大象去個小池入面幫佢刷身沖涼，大家（人）玩下水，跑下笑下咁就玩咗一日，喺園內沖埋身就搭車返酒店。

返到酒店，求其搵咗一間小店食泰國菜，之後又喺附近按摩。

 

 呢間按摩好一般

已經第二之去到Awana冇得按了，咁就是但搵一間按下背啦，點知按完更差。

之後去行夜市，又係求其搵間店食飯，不過上次去食到好好味的椰子雪糕唔見咗，好傷心。

行完夜市，搭tuk tuk返酒店，然後喺附近行下，又食下雪糕，跟住就返酒店休息。

今日真係非常滿足呢。

3-4-2016 又去清邁

今日下晝三點幾機去清邁，今次主要係去hea。

今次去清邁個匯率係近年來講最靚的一次，4.4都算高位了。

今次住得豪少少，De Naga，在舊城區內，酒店燈光比較暗，老實講我覺得呢間酒店同我第一次去清邁時住的guesthouse好似都差不多。

不過呢間貴野好多蚊。

今日星期日，所以嚟到第一站又係去sunday walking street，不過今次好似多咗好多小食檔，同多咗好多中國人。

行下食下買下，咁就行到十點，真係好攰呢。

第一日就係咁喇。

28-3-2016 晨早回港

今朝八點幾機, 所以四點幾就要起身去機場。

去到機場俾我搵到個好正的位訓覺, 哈哈...

咁就玩咗五日。

27-3-2016 十分瀑布

今日起身見到落雨, 於是瞓多陣先起身。

今早去咗間叫做Louisa Cafe食早餐, 我好耐冇飲咖啡了, 嚟到台北冇可能唔飲囉。

搭台鐵去瑞芳, 不過見到架區間車會去猴硐, 咁冇理由唔落車探貓架。

每次去台北總要抽時間去猴硐, 太愛呢度了。

我哋都只係留咗大約45分鐘, 之後搭小火車去十分。

之前都去過九分菁硐猴硐但偏偏未去過十分, 今次去埋呢條小支線都應該冇乜特別地方想再去了。

一落車, 大家過火車軌。

過路軌

咁喺十分大家都會放天燈, 當列車駛離車站之後, 成條路軌都可以放天燈, 有車嚟時大家就散水, 好似泰國個鐵路市場呢。
 

 一疊疊天燈

 放天燈囉

咁我哋都有放天燈啦, 不過放完一次應該冇下次, 放完之後我諗諗下, D天燈放完唔會有人執架喎, 咁一堆垃圾喺山頭, 完全係破壞環境, 之後行去瀑布沿途都見到D爛天燈掛喺樹上, 所以, 其實真係唔應該放天燈的。

放完天燈就行去十分瀑布, 由火車站行大約三十分鐘, 可以租電單車, 但有點無謂因為架車都係唔可以入園區, 而且出入口都唔同位置, 租架車更麻煩。

去年年尾睇完伊瓜蘇, 其實對其他瀑布都唔係有太大期望, 除咗非洲個世界第一大瀑布之外, 我諗我都唔會再專登去睇瀑布了, 只係今次剛巧唔知做乜就去睇下啦。

其實都靚既, 而且又見到彩虹, 收貨啦。

跟住返火車站, 食少少野然後搭火車返台北, 其實經濟許可真係包車好D, 小火車真係逼到透唔到氣。

所以如果去十分其實真係好適合包車, 行唔係問題, 逼先係大問題。

返到台北, 去京站超市買手信, 然後返酒店附近間三多屋買外賣, 酒店職員介紹架喎。

又真係幾抵食既, 魚生好厚肉, 個櫻花蚊炒飯都好好味, 而且重有甜品同湯送, 好抵。

食飽抖一陣, 再出發去寧夏夜市食野。


今次又玩佢的小檔掉乒乓球, 好好玩喎, 哈哈...

食飽玩完返酒店執行李, 明早好早機呢。

26-3-2016 台灣賞櫻

今日非常好天, 一早起身我哋先去7-11買關東煮做早餐(我真係好鍾意食台灣7仔的關東煮), 然後搭捷運去淡水, 今日要去天元宮賞櫻。

去到淡水站, 一出站已經有天元宮櫻花專線, 好方便。

大約20分鐘車程就去到天元宮。

 天元宮外的反肚小狗

其實天元宮唔算好多櫻花啦,  不過我之前未見過粉紅色的櫻花, 呢度就有喇。

不過其實我哋去到時都已經過咗盛放期, 所以唔算非常靚。

好快就行完。

跟住搭返專車出淡水, 我哋沿住老街同海旁行下食下, 我終於搵到白灼魷魚喇。

不過今次食又係有點失望, 幾年前第一次食, 魷魚鮮甜, 今次好多沙, 食唔返以前的味道。

沿途遇見貓星人

行行下, 去到馬階醫院。

老實講我以前完全唔知呢段歷史, 我都只係吃喝玩樂好少留意當地歷史, 不過有機會都應該了解多D既。

馬階醫院內

馬階醫院旁教堂

睇完, 求其搵間舖頭食飯啦。

好味道。

食飽都好早, 唔知去邊, 咁買船飛過八里啦。

其實我都唔知八里有乜睇, 去到先算。

一落船向右行啦, 見到有一堆小店, 其中有一間買N年前的玩具同零食, 好開心喎, 我呢D老餅最鍾意。

好開心喎

我喺呢間小店都買咗幾個豬仔錢箱, 嘩哈哈.....

八里, 峇里, 哈哈...

 八里老街

好快又行完八里, 我覺得呢度有點似旗津, 但多人好多, 行完八里之後我哋搭返船過淡水, 買埋少少手信就返酒店抖一陣。

放低D野就出去食野, 今晚打邊爐, 上次食馬辣不錯, 今次試下食洛神賦。

馬辣多野食好多, 不過呢度環境靜好多, 種類不多但D野都新鮮。

食飽, 去附近的sogo行一陣睇野, 跟住返台北車站新光三越買手信, 再行下京站, 然後返酒店休息。