大阪感想

1. 本來話去大阪係為咗去姬路城, 但最後竟然冇去到, 非常可惜!

2. 大阪好多大陸團...

3. 日本野食確實唔貴, 而且都幾好味

4. 日本買野真係會買到失控, 雖然我已經算買得好少...

5. 奈良好好玩, 完全唔夠時間玩, 我覺得奈良可以留一晚

6. 京都唔夠時間玩, 哲學之道冇想像中咁多貓, 不過好彩今次睇到好多櫻花

7. 日本人其實都係冇乜讓座意識, 而且我都見到D日本人周街吐痰痾尿

3-4-2015 我以為返咗大陸

今日最後一日在大阪, 本來諗住去姬路城, 但天氣唔好, 而且我突然發現去姬路城原來有機會要排幾個鐘頭隊(網上資料, 不過我估係誇張咗), 由於今日離開日本, 所以都係留在大阪算了...

出發去大阪城, 早餐食moss burger, 哈哈... 我都覺得有D離譜, 食埋香港有的野...

食熱狗, 哈...

去到大阪城, 唔係好對路, 有超多大陸旅行團, 我一度懷疑自己返咗大陸, 見到日本國旗我以為睇錯, 哈哈...

至於大阪城本身... 我真係對日本歷史零知識, 冇仔細睇每一個展品就離開了...

大阪城

去完大阪城返酒店check out, 然後喺酒店樓下間cocarde食野, 佢應該係UCC的朋友, 佢D蛋糕真係好好味~~~~~ 今次係第一次飲french press, 唔錯!

my lunch!

食完晏搭地鐵去心齋橋, 出發前我喺香港睇中咗個agnes b袋, 不過呢度冇呢隻色, 哈... 慳返...

去藥房買埋最後要買的野, 人類總係不停犯埋同一個錯誤, 又係有人打尖, 又係話佢扮聽唔到, 強國即係強國!

之後去咗驚安殿堂買手信, 跟手過隔離間舖食大阪燒, 因為我覺得去大阪, 一定要食大阪燒, 哈哈.....

大阪燒

好好味~~~

諗諗下, 不如行下日本橋睇figure, 原來心齋橋同日本橋都近, 食飽行過去十零分鐘左右, 我估唔到我竟然抬咗個海賊王figure返嚟, 而更估唔到我返到嚟香港會後悔唔買多幾個! 哈哈...

羅

本來從來冇諗過今次會去黑門市場, 但行去日本橋途中見到, 於是回程時入去食返件拖羅同海膽先~~~

拖羅~~~

食飽, 返酒店拎行李, 然後搭JR去機場, 入閘後見到Royce平得好離譜, 於是買到上機, 哈哈....

喺機場的壽司店又唔差喎, 食埋個壽司拼盤先上機, 哈哈... 大滿足呀!!!

又食壽司

2-4-2015 櫻花+貓=哲學

經過奈良唔夠時間的教訓, 今早好早起身去京都。

最初我冇打算去京都, 只係個個人都話去大阪唔去京都好可惜, 加上西班牙文同學仔話哲學之道好多貓, 所以無啦啦去埋京都。

先喺酒店對面的松屋食早餐, 然後搭JR去京都, 九點多已經去到京都, 首先喺巴士站買張巴士1 day pass, 跟住搭206號巴士去清水寺。

去到京都喇

由巴士站行去清水寺都係一段幾長的路, 非常多遊客, 去到清水寺, 第一站見到隨求堂, 見到有人俾100yen入去一個地下室, 其實都唔知係乜, 不過見唔貴就入去睇, 呢度叫做胎內巡, 入面黑到乜都睇唔到, 只係靠側邊的扶手帶路, 去到盡頭會見到一舊發光的石頭。

清水寺入口

隨求堂

睇完石頭, 去咗地主神社。

地主神社

其實我對今次大阪之旅係毫無概念, 完全唔知每一個景點有乜睇, 去到地主神社見到D人合眼由一舊石行去另一舊石先知呢個係姻緣石。

姻緣石

之後去清水舞台, 呢度依懸崖而建, 全木製, 飽覽京都景色, 幾靚。

清水舞台

由下而上望

去完清水寺, 準備搭車去銀閣寺, 未肚餓但有D攰, 於是求其搵咗間小店飲咖啡。

嘆咖啡

好可惜我喺日本暫時未搵到一杯優質咖啡。

休息一陣, 搭100號巴士去銀閣寺。

沿途真係好多櫻花囉... 影咗一陣相, 跟住再行上銀閣寺。

櫻花路

其實暫時我都唔知呢D寺廟有乜特別, 大部份都唔可以入內, 所以齋睇外表, 我真係唔知有乜大分別...

銀閣寺

跟住行哲學之道, 決定係京都係因為出發前一星期西班牙文同學話哲學之道有好多貓, 於是我即刻話要去京都睇貓。

終於見到粉紅色櫻花

不過行咗好大段路, 只有人, 貓毛都冇條, 但沿路有極多櫻花樹, 我覺得我今日已經睇晒十年的quota。

哲學之道遇到的大熊

哲學之道好長, 行極都未行完, 中途經過一個叫做法然寺的地方, 聽聞只係4月1-7日特別開放, 所以入去行下啦。

法然寺入口

去咗好幾個寺廟, 我最鍾意係法然寺, 起碼我可以入去睇下日式建築的內部係點, 而且佢竟然有間房俾遊客飲茶。

嘆茶中

哈哈哈哈.....

抖一陣, 又繼續行哲學之道。

行到若王子神社, 終於見到幾隻貓了。

候桐都多過佢...

終於行完整條哲學之道, 之後唔知點解行到去永觀堂同南禪寺, 不過只係路過, 冇仔細參觀。

若王子神社

南禪寺

已經四點幾, 去唔到金閣寺, 所以搭車去京都JR站。

又唔知點解行到去動物園附近, 無意中發現蹴上傾斜鐵道...

蹴上傾斜鐵道, 但不是為國爭光

但我未食飯好肚餓, 完全冇心機行。

呢度附近又冇野食, 我就快餓死了...

問警察同路人之下終於去到巴士站, 塞車之下六點先去到JR站, 一見到麥當勞即刻衝入去食野, 呢排有櫻花味shake shake薯條, 哈哈...

好咸的薯條粉

補充咗體力, 又有心機行了, 京都JR站旁有間Bic Camera, 入去搵kindle, 點知佢得返3G版, 照殺!

之後行一陣和菓子舖就搭車返大阪了。

返到酒店放低行李出去附近的超市行下, 呢度的超市同吉之島一樣, 冇乜特別。

今晚食燒肉放題, 整個行程最貴係呢餐, 但, 唔吸引。

燒肉

食飽, 返酒店執行李準備聽日走了...

1-4-2015 意外的購物日

今日本來打算去姬路城, 不過一起身見大阪落雨, 再睇天氣見姬路都落雨, 所以臨時改去行街買手信, 諗住最後一日先再去姬路。

先喺酒店附近食早餐, 今朝一早食咗個烏冬加豬扒飯, 真係好痴線。

呢個早餐我都覺得太誇張了

食飽, 搭車去梅田, 因為我太愛鬆弛熊, 諗住去梅田店買返幾隻返香港。

搭地鐵去到梅田站, 一出地鐵就見到個樓高N層的yodobashi電器店, 由文具電器到手錶都有得賣!

全套海賊王呀!!!

連望遠鏡都有!

本來諗住買kindle, 點知冇得賣, 不過竟然最後買咗玩具、空氣清新機仔同baby G。

手錶實在太平, 我聽到佢呼喚我帶佢返屋企, 哈哈.........

剩係行呢幢電器店都行咗成兩個鐘, 然後喺搵鬆弛熊專門店時路過藥房買下藥, 最瘋狂係入埋書店買書, 上西班牙文時同學話東京書店有西班牙兒童書賣, 結果我喺大阪都搵到。

太正了!!!

終於搵到鬆弛熊專門店, 好失望, 香港專門店仲多野賣過佢!

有點失望的鬆弛熊店

買完野, 喺附近搵咗間舖食拉麵, 跟住返酒店。

搭車回酒店沿途見到櫻之宮站有好多櫻花, 所以又落車影下, 雨下櫻花都幾靚, 不過影相就一般。

櫻之宮

睇完櫻花搭車返酒店休息, 然後搭車去心齋橋。

途經寵物店見到一隻猴子寵物

心齋橋... 真係冇乜特別, 只有幾條好長的購物街同埋固力果個廣告, 途經bic camera問下佢有冇kindle啦, 冇晒wifi版, 唉...

固力果

夜了, 返酒店附近食野, 本來諗住食返琴日食過的壽司店, 點知去到已經last order, 所以求其去咗一間要企喺度食的壽司店食野。

琴日問咗朋友知道拖羅的日文, 呢件拖羅正到呢...

流晒口水~~~

食飽, 喺酒店附近的藥房行下夾下價, 跟住返酒店休息...

呢兩日都好西班牙式生活, 十點早餐四點午餐十點晚餐, 哈哈...