31-3-2015 奈良被鹿玩

一早起床, 去酒店附近食碗烏冬做早餐, 然後搭JR去奈良。

早餐

去到奈良十一點幾, 之前有人話奈良好少野行, 兩個鐘可以玩完, 錯晒囉!!!

一出JR站問旅客服務中心攞地圖, 我地可以選擇搭巴士或行路去東大寺, 不過時間尚早, 行路吧。

行去東大寺的沿途

沿途經過淨教寺同興福寺, 前者係一間好細的寺廟, 但我睇唔到有祭祀的地方, 只係見到日式庭園, 後者... 我掛住賞櫻同玩鹿, 冇認真參觀過...

淨教寺內

往興福寺中途所見的櫻花

興福寺

跟住行到去奈良公園, 有好多鹿喎, 我地買D餅餵鹿, 同鹿自拍下, 被鹿圍下, 睇下D鹿襲擊人類同嚇喊細路, 咁就玩咗個幾兩個鐘。

去到東大寺, 一間木製的寺廟, 加上櫻花襯托下都幾靚既, 可惜我對日本文化同歷史係零認識, 變成一個港女咁行完就算, 真係唔知點解, 去泰國睇廟我都唔係咁hea架喎...

東大寺

東大寺

回港後睇新聞見到東大寺被人潑油, 我真係覺得好多地方想去的一定要襯早去...

然後行去春日大社, 我真係睇唔到有乜特別, 只知又係一個文化遺產...

春日大社

行完都三點, 我地仍然有好多個博物館未去, 沿路行返去JR站時終於有時間食晏, 食飽搭JR返大阪, 搭車時見到酒店附近有條河有好多櫻花, 於是行去影下相。

櫻花路

影完相返酒店小休, 然後去大阪城公園準備睇夜櫻, 點知去到先發現明晚才開始有夜櫻睇, 所以又搭車返京橋行下。

大阪城公園晚上

原來酒店附近有咁多野食, 我地最後揀咗大起水產食壽司刺食, 睇唔明的日文就whatsapp問朋友, 哈哈.....

刺身

食飽, 喺酒店附近的藥房同化妝品店行一陣, 跟住返酒店。

邊個同我講奈良冇野行?

30-3-2015 首次去日本

去過咁多次旅行, 今次係第一次去日本! 講出嚟完全冇人信!

由於買到0蚊機票, 加上日元匯率大跌, 而且過去堅持唔去日本的原因都被推翻了, 種種原因造就今次日本之旅。

今次坐下畫機去關西, 之前網上討論區話香港快運復活節超售嚴重, 所以晨咁早去到機場check in。

去到日本過晒關坐埋JR去到京橋已經12點, 喺酒店check in完即刻出去食野, 今次住Hotel Keihan Kyobashi, 好近JR同地鐵站, 附近又有好多餐廳開到好夜, 非常方便。

第一次去日本連JR售票機都覺得好新奇

不過人生路不熟之下我地的第一餐係食吉野家。

吉野家

哈哈哈哈.....

食飽, 返酒店休息, 準備明日的賞櫻之旅。

曼谷感想

1. 第一次搭晒曼谷兩條運河的船, 方便之餘都幾好玩

2. 金山寺真係非常值得去, 唔駛錢可以睇晒曼谷市內的景

3. 大城府唔應該跟tour, 趕到根本睇唔切

4. 法醫博物館個開放時間真係好隨意, 明明網上話日日都開, 結果星期六日唔開

5. 新曆年去曼谷寺廟多人到不得了, 上次去臥佛寺冇遊客, 今次逼到傻

6. 曼谷倒數氣氛一流, 但完全冇人流管制, 其實都幾危險

7. 機場兌泰幣個rate係史上最衰

8. 即使第N次去寺廟, 但我仍然短褲出門, 成日諗住去到先借, 結果去到大皇宮碰釘了, 一條裙300b, 貴到呢...

9. 今次曼谷之旅雖然係去主要景點, 但其實我仍然有好多個景點未去...

4-1-2015 最後一日在曼谷

最後一日在曼谷, 起身後落樓下食早餐然後游水, 一向去曼谷都好少用到酒店設施, 今次連桑拿都焗埋, 唔錯!

訂酒店時無意發現原來我係會員, 所以有得免費延遲退房, 5點先check out真係好正。

下晝去Siam Paragon的food court食飯, 食完海南雞飯加多個芒果糯米飯, 然後行下超市行下晝局, 跟住返酒店執野搭地鐵去機場。

海南雞飯

5日4夜曼谷之旅結束了。