31-12-2014 曼谷倒數

本來冇打算去曼谷倒數, 不過去台北酒店太貴(機票唔貴喎), 浮羅交怡又怕太單一活動, 所以選擇去曼谷睇下寺廟。

搭香港航空12:10機去曼谷, 落機搭BTS去酒店, 放低行李攪掂晒都五點。

今次住Phloem Chit的Novotel, 幾方便, BTS隔離。

休息一陣出去玩, 先去siam square行個圈, 見到mango tango的芒果糯米飯, 嘩... 我好掛住泰國的芒果呀!!!

太好味了

行咗一陣siam discovery, siam centre, paragon... 最後喺paragon的piri piri flaming chicken食飯。

喺間雞店食蝦

食飽飽四圍行, 見到一間叫做Wat Pathumwanaram的寺廟, 有好多人喺度念經, 佢地頭上連住條繩, 後來參加local tour時問個guide話佢地D繩係駁住主持, 咁就好似主持直接祝福佢地咁喇。

信眾念經中

跟住行去central world, 剛巧佢有個snoopy展, 有好多隻snoopy。

snoopysssss

四圍行四圍食, 跟住去central world出面等倒數。

呢度真係超多人, 而且氣氛好好, 倒數前有DJ播歌, 又有D人喺天橋拋D公仔紀念品俾橋下的群眾搶, 都幾好玩。

呢度有兩個大電視倒數, 但時間係爭幾秒, 太好笑了, 倒數完就會放煙花, 好耐未試過咁有氣氛咁倒數了。

睇煙花

不過呢個廣場冇人流管制, 離開時仍然有一堆人逼入去, 如果有乜意外其實真係幾危險。

倒數完基本上都搭唔到地鐵, 幸好酒店距離central world唔遠, 所以行返去都好方便。

回酒店ZZZ了...

釜山感想

1. 甘川洞文化村真係好吸引, 簡直係必去景點!!!

2. 釜山食物好好味, 燒肉飯團炸雞海鮮... 嘩... 流口水...

3. 雖然釜山有宣傳佢的夜景, 但其實唔太吸引

4. Ibis唔係好得, 住motel更好

5. 去慶州的時間唔太多, 加上微雨, 有點可惜, 石窟庵乜都封住晒, 有點失望

6. 釜山動物園唔太, 但都幾得意, 只係入場費有點貴

7. 估唔到喺釜山中老年人的英文比後生仔好, 問路問親後生仔都係唔識, 但中老年人好熱心帶路, 而且喺釜山好彩遇唔到勁大男人亂撞人的男人, 不錯

8. 冇時間去貓cafe, 可惜

3-11-2014 最後一日在釜山

最後一日在釜山。

九點左右起身, 執好行李由酒店行去西站搵間coffee shop食早餐。

千揀萬揀(其實好多都未開門), 最後去左樂天附近的opera coffee shop食早餐, 叫咗杯hazelnut飲, 唔好味。

食完早餐, 喺附近行一陣, 在路邊小檔口食咗條紫菜包飯就行返酒店check out了。

搭地鐵去機場, 呢個機場好細, 冇野行。

之前d人話hk express會delay, 今次真係delay得有D奇怪, 我地入閘撕完機票行到接駁橋但突然唔俾我地上機, 後尾見到地勤人員叫咗幾個人離開機場搭聽日班機(話行李過重喎), 已經過晒關又叫佢地入返境真係好不可思議。

擾攘咗一輪, 終於上到機, 但前排有乘客唔舒服, 佢用咗一個鐘決定落機, 跟住又有保安員上機檢查, 攪完可以起飛了。

但更神奇係原本直航回港, 機師話唔夠油要先飛去台中加油, 哈哈哈哈.... 實在太有趣, 結果遲咗成四個鐘先返到香港, delay唔夠六小時, 保險冇得賠...

咁就五日了。

2-11-2014 慶州睇世遺

今早一早起身搭長途巴士去慶州。

搭地鐵去到老圃站, 買巴士票去慶州, 都幾方便, 20分鐘就有一班車, 車程約一個鐘。

買咗巴士票, 在Lotteria食早餐, 然後上巴士...

喪訓...

訓醒到慶州喇, 落車後過對面馬路搭11號巴士去佛國寺, 都差不多要半個鐘先去到。

佛國寺係世界文化遺產, 其中花園的紅葉都幾靚, 而呢個寺廟應該重點在舍利子, 我有排隊睇, 但其實... 我唔知自己睇緊乜...

佛國寺

佛國寺紅葉

紅葉

佛國寺

我見postcard都係影呢個角度, 哈

佛國寺都幾值得去參觀。

離開佛國寺, 沿途幫襯街邊熟食檔食野, 跟住坐10號巴士去石窟庵。

由佛國寺上石窟庵都要15分鐘車程, 巴士約1小時一班, 所以我地預返時間準備留1小時在石窟庵。

由巴士站行入石窟庵都要約10分鐘, 石窟庵睇相真係好吸引, 但入到去成個石像被玻璃隔住, 反光之餘又睇唔清楚, 呢個景點其實真係睇postcard好過, 唔值得去。

剛好一小時行完, 再搭巴士返慶州長途巴士站, 本來想行下市中心, 但開始落雨, 所以都係離開了...

返到釜山都五點幾, 問問老圃站個tourist information最近的大型超市喺邊, 跟住就搭地鐵去Guseo站的E-mart。

韓國的超市真係好好行, 買完手信返酒店放低行李就搭地鐵去南埔商圈搵野食。

又~~~ 去咗玄彬街食燒肉, 嘩哈哈哈...

今晚呢晚燒肉店的質素極佳, 兩個人食都只係二百幾, 好抵!!!

食到好飽, 在Biff Square行一陣然後返酒店了。