沙巴感想

1. 海鮮平靚正!!!

2. 市中心冇乜野好行, 商場真係有點羅湖feel...

3. Manukan Island極污糟! 好彩Sapi水夠清, 浮潛一流!!!

4. 雖然睇唔到probosics monkey, 但睇到螢火蟲真係太感動了~~~

5. Minangah Beach係我暫時見過最靚睇日落的地方~

6. 今次住間酒店方便出海, 下次去陽光與海灘都情願俾貴少少住近海邊~~~

16-6-2014 I will be back!!!

最後一日在沙巴了。

今日其實冇乜活動, 起身食早餐後又游水, 然後返房沖涼執行李。

早上游水時有D太陽, 但游完水返房之後就開始落雨, 所以去唔到動物園了。

Check out完搭shuttle bus去wisma, 午餐食馮業。

喇沙

出發前有人話馮業非吃不可, 不過可能我唔太好喇沙同撈麵, 我覺得一般啦。

食飽, 行去Centre point行吓超市, 然後搭車返酒店大堂食high tea。

可惜好唔好彩今日lounge有活動, 4點就要close, 所以我哋求其叫杯野飲喺餐廳hea下。

然後我哋行去隔離間Magellan睇吓, 呢間比我今次住嗰間貴少少, 不過佢泳池大好多。

Magellan其中一個泳池

不過我哋如果唔係用盡酒店設施的話, 其實平少少都好, 反正都係出海多。

Megallan酒店

行完都要搭車去機場了, 5日4夜沙巴之旅結束, 我實在太愛呢度浮潛了, 我覺得我係會再來的!!!

15-6-2014 Sapi Island浮潛記

一早起身睇世界盃意大利對英格蘭, 有驚無險小勝2:1, 心情大好落樓下食早餐。

食飽, 搭的士去Sunday Market行街。

Sunday Market

呢個Sunday Market星期日上晝開到好似下晝2點左右, 呢度有好多古靈精怪野賣, 除咗手信紀念品外, 連貓狗都有得賣。

賣貓

買咗D手工梘, 鎖匙扣等手信, 馬來西亞咖啡出名, 所以買咗少少咖啡豆, 同埋又買咗杯即食燕窩食, 足料抵食!!!

行完Sunday Market, 搭的士返酒店準備去Sapi Island浮潛。

話說昨日跟local tour時導遊問我哋有冇出海, 我話佢知Manukan好污糟, 佢就建議我哋去Sapi, 話靚好多, 所以去多轉浮潛啦。

果然冇介紹錯, 呢度真係清好多, 而且唔駛游到好出已經有超級多魚, 第一次浮潛見到一堆魚衝去我個潛鏡前面, 爽到爆!!!

不過為咗專心浮潛的關係, 呢個島我係冇影相的。而且為咗專心浮潛, 我連錢都冇乜點帶來, 所以玩唔到flying fox了...

12:30玩到3:00, 然後搭船返酒店, 喺酒店泳池游多轉水先, 再喺池邊食個fish & chips醫醫肚, 跟住先返房沖涼。

沖完涼搭車去Wisma Plaza, 又去行超市。

喺Wisma Plaza附近有個叫做美麗華超市的東西, 過去行咗一陣, 然後行埋KK plaza同Suria的超市頹買手信, 跟住過去Hyatt Regency附近的酒吧食飯。

KK市中心看日落

是晚選擇Upstar Cafe食晚飯, 呢度食西餐真係好抵!!!

食飽飽, 又搭Shuttle返酒店。

返到酒店休息一陣覺得精力太旺盛, 於是落樓下Gym Room踩下單車做下Gym, 哈哈... 今日的運動量簡直係我半年的總和呀!!!

14-6-2014 最美麗的日落

凌晨3點起身睇西班牙對荷蘭的比賽, 估唔到西班牙竟然恥辱地輸5:1!!!

睇完波, 再瞓一陣, 然後9點起身落樓下食早餐, 食飽搭的士出去centre point搵旅行社報今日下晝團睇螢火蟲。

報完名, 搭的士返酒店游水, 彈下結他休息下, 然後2點有車接我哋去睇猴子。

話說沙巴出名長鼻猴子(probosics monkey), 呢個團係睇呢D猴子同埋睇螢火蟲, 我哋坐近2小時車去到河邊, 先食下少少小食(炸香蕉同班蘭糕), 然後上船睇猴子。

食小食

完全睇唔到長鼻猴子, 而成程船睇到普通猴子的數量, 我估香港金山郊野公園都多佢一百倍!

其中一隻猴子

呢程船令我諗起Taman Negara之旅。

上船地點

睇完猴子, 搭幾分鐘車去睇日落, 今日天氣一般, 所以睇唔到太陽跌落大海, 不過呢個日落景可以稱得上我見過最靚的, 無污糟沙灘, 有一堆牛, 有蟹, 太陽跌落海, 沙灘又夠大, 遊人又唔多, 呢度真係perfect!

同一堆牛一齊睇日落

好彩問一問導遊呢個沙灘叫乜名, 呢度叫做Minangah Beach, 後來上網睇資料發現原來沙巴睇長鼻猴有好多個地方, 呢個並唔係最熱門之地。

Minangah Beach

睇完日落, 喺沙灘旁食自助晚餐, 期間有好幾隻貓過來討食, 對愛貓的我來說實在太高興了!!!

食自助餐

食飽, 上返車去返剛才睇猴子的河邊準備上船睇螢火蟲。

今晚天色好好, 頭頂好多星, 而好詭異地咁清的天無端端會有閃電, 大自然真係好奇妙。

導遊會用電筒閃閃下引D螢火蟲出來, 天上有星星, 身邊有螢火蟲, 呢一個景真係令人太感動了!!!

雖然睇唔到長鼻猴, 但呢個螢火蟲之旅絕對值回票價! 睇完返到酒店都已經10點了。

13-6-2014 Manukan Island浮潛記

昨晚睡得極佳, 起身就落樓下食早餐, 然後報團出島玩浮潛+parasailing。

近KK的島有三個, 我哋選擇咗去Manukan。

喺Manukan碼頭其實見到好多魚, 但可惜近岸的地方真係好污糟, 超級多垃圾, 但我又唔係太能夠游到出去遠D的地方, 所以唔係睇到好多魚。

Manukan Island

Parasailing要坐隻艇去遠少少的地方, 話有10分鐘, 但我計時都唔夠7分鐘, 不過可以又升高又落水其實都幾好玩。

parasailing

由朝早10:30出發玩到下晝2點, 由於個島真係太污糟, 都冇乜心機再浮潛, 於是搭船返酒店沖涼, 然後搭shuttle bus去Wisma Plaza行一陣。

喺Wisma Plaza對出有一個露天魚市場, 時間尚早, 簡單行咗一個圈食隻燒雞翼, 然後再繼續行下附近的Suria Sabah商場。

Suria Sabah

呢個商場叫做比較grand少少, 行下超市hea下, 然後返去魚市場食海鮮。

海鮮

呢度海鮮比昨日大茄來平好多, 不過個奶油蝦好似昨日好味D。

辣椒鮮魷

食到好飽, 又行wisma, 然後搭shuttle bus返酒店休息了。

12-6-2014 沙巴過生日

早前見fanfare有特價機票去沙巴, 於是造就咗今次沙巴生日之旅。

一早搭的士去機場, 8a.m.機真係有D攞命。

昨晚只睡一小時, 有D頂唔順, 不過搭飛機又瞓唔着, 睇吓李鍾碩套新電影啦, 我發現即使係我鍾意的主角, 但套戲如果太爛我都係冇辦法睇落去, 所以唯有睇ipad download未睇完的韓劇。

今次住Sutera Pacific, 估唔到去到酒店可以即刻有房, 對住golf court, 不錯哦~

酒店房間view

放低行李整理儀容就落酒店下面行下, 然後喺酒店的餐廳食lunch, 之後返房換泳衣去游水, 查實因為工作關係我都好耐冇游過水了。

是日的lunch

海店的細沙灘

酒店的海景

游水浸水玩咗成個鐘, 然後返房沖涼換衫出市中心行吓。

由於酒店唔近市中心, 要搭佢的shuttle bus或者坐的士出去, 我哋較啱時間搭到shuttle bus去centre point, 不過似乎馬來西亞的商場都有D詭異, 好羅湖商業城feel。

由centre point行出去海旁的大排檔行吓, 搵咗一檔坐低飲個椰青先, RM4蚊一個, 可惜唔凍。

Local market

然後行去另一個商場kk plaza, 行咗一陣超市買咗少少糧草, 跟住喺附近行一陣。

大約6點, 搭的士去Asia City的大茄來食海鮮。

呢度的老虎蝦堅正, 啖啖肉, 今餐海鮮餐食得好滿足~~~

奶油蝦

然後再過centre point行多陣, 跟住搭返shuttle bus返酒店休息了。

咁就過咗生日了。