Vicky's Travel Blog: 3月 2014

2014年3月19日星期三

清邁感想

1. 清邁真係平靚正, 自然風景不錯, 而且空氣好好, 我喺呢邊食少咗好多二手煙。

2. 上次去清邁真係冇乜點買嘢, 但今次唔知點解發咗癲咁買, 乜清邁D嘢平得咁交關?

3. 在warorot冇行到佢個三層高的market, 大錯特錯。

4. 清邁的甜品真係好正, sailomjoy的mango pancake再食依然精彩, night market的椰子雪糕簡直係一試難忘。

5. 四圍都係貓, 呢度先可以有資格稱做貓城, 鼓浪嶼不配!

6. 今次學煮泰國菜冇我之前幾次整得咁好味, 而且學唔到芒果糯米飯有點失望呢...

清邁之旅其中一隻有緣見到的小貓~

26-12-2013 博物館遊

最後一日喺清邁, 瞓至自然醒是常識吧? 哈哈...

不過都係好早就起咗身喇, 因為去旅行我的生活係好健康的。

執好行李準備check out。

check out完行去酒店後街食海南雞飯, 一般啦...

食飽, 過隔離的Arts & Culture Museum行吓, 入場費90匹。

Art & Culture Museum內的火車

剛巧佢有一個關於雀鳥的展覽, 真係唔錯。

畫得真靚

臨離開時見到有本guest book, 翻開就見到呢樣野!

完全唔識尊重人的中國人!!!

出去旅行係代表緊你自身的民族, 人必自侮然後人侮之! 唔好怪其他人歧視中國人!!!

睇完展覽, 行去Sailomjoy食晏。

噢, 賣飛佛!!!

同桌有一個單獨旅行的韓國女仔, 佢話清邁行之後會去香港9個鐘遊玩, 佢問我有乜食同玩可以推介俾佢, 我竟然係即時呆咗唔識答。

而家的香港已經唔係過去我熟悉的香港, 我講唔出叫佢行旺角百老匯街或者尖沙咀名店商場, 茶餐廳只係剩返翠華, 嗰一刻我真係啞咗...

最後都講咗幾間冇乜特色的餐廳叫佢可以試下, 實在太唔好意思呢...

食飽, 返酒店拎行李, 然後搭的士去機場。

5日4夜清邁之旅結束了...

25-12-2013 聖誕遊山洞

今日參加咗local tour去Chiang Dao Cave(唔知中文係乜)。

喺清邁常見的local tour係去清萊睇長頸族、去金三角或者睇大笨象, 本來我都想參加一日營同大笨象玩遊戲, 但因為我太遲confirm清邁行, 所有一日營都full晒, 我見有一間旅行社去呢個Chiang Dao Cave, 即管參加。

不出所料真係冇乜人join, 冇人的意思係... 成團得我哋兩個。

司機兼埋導遊, 首站去orchid farm, 之前去過, 加上我對植物興趣一般, 所以好快行完。

然後去Chiang Dao Cave喇。

呢個cave其實係一個鐘乳石洞, 我哋入去洞口會遇到一班當地婦女, 基本上一定要俾錢僱用佢哋帶我哋入山洞行, 洞內冇照明系統加上要左穿右插, 冇導遊帶住我諗我哋一世都行唔返出來。

Chiang Dao Cave前的湖

洞內

導遊行先

導遊會指俾我哋睇造型特別的石, 臨離開洞時更加見到一堆蝙蝠。

行完山洞, 上車去下一個景點Pah Plong Cave。

呢個cave其實係一個在山上的寺廟, 首先要行百幾級樓梯上去, 沿途會有D牌以英文寫住一D佛理。

目標就係呢個寺

寺內

由呢個寺廟望出去就係一片叢林, 其實都幾靚。

去完呢個廟, 司機車我哋去咗一個路邊攤食河粉。

都OK啦, 另一個重點係呢個路邊攤有好多貓, 超開心!!!

小可愛, 你們好!

食飽飽, 上車去Wat Ban Den。

呢個係一座擴建中的寺廟, 司機話佢出名係因為入面有個僧侶喺三十幾歲已經得道(大約係咁意思啦), 呢間廟起咗十年左右, 所以都係好新。

最後一個景點係去Srilanna National Park睇Buatong Waterfall。

這就是瀑布 ^_^"

咁我都有喺呢個小瀑布度爬吓, 不過一跣腳就跌到損手爛腳, 好彩着咗民族褲, 非常快乾而且唔會濕漉漉貼住對腳, 萬歲!!!

就係咁, 呢個local tour就結束了。

回清邁市中心後請司機車我哋去超市行街買嘢, 我哋去咗Lotus Tesco呢個大型商場, 一入去就見到Swensens, 超興奮, 即刻衝入去食個雪糕先!!!

正正正!!!

然後去超市買手信~

我實在太愛逛香港以外的超市, 實在太多嘢睇喇!!!

逛完超市再喺tesco門口的小檔行一陣, 就坐tuk tuk返酒店了...

休息一陣再出去行, 在舊城區門口有個count down festival, 有嘢食又有表演睇, 好精彩!

睇表演

買嘢食

跟住行去酒吧街正正式式咁食晚飯。

@ teak

食飽又返酒店瞓覺~~~

2014年3月18日星期二

24-12-2013 又去煮泰國菜

今朝好早起身呢。

先喺酒店食個頹早餐, 然後等車嚟車我哋去學煮泰國菜。

今次選擇asia scenic市內學泰國菜, 第一站又係行街市。

街市

老老實實, 喺香港我真係唔會咁神心行街市, 哈哈哈哈...

呢間學煮泰菜的特點係佢有四個種類俾大家學, 包括湯、前菜、甜品同粉麵, 本來我想學整芒果糯米飯, 但大多數同學都想學粉麵同湯, 咁唯有跟大隊。

選擇完種類就可以選擇你想煮的款式, 我選擇coconut milk soup同pad thai, 然後成組又會一齊整咖哩。

咖哩

煮湯中

其實泰國菜都算易煮, 掉晒啱比例的香料落去已經攪掂。

佢地會俾埋其他菜式的recipe俾我地, 返到香港我跟住整芒果糯米飯, 都OK喎。

煮完食完返酒店抖下, 然後沿大街行去河邊。

邊行又係見寺廟就行入去睇下啦。

喺清邁最令我覺得開心係見到有好多貓, 寺廟內成日都會見到貓踪, 人貓係可以共處的。

一隻嗲到爆的貓

Wat Bupparam內的貓大人

其實清邁河都真係冇乜特別。

清邁河

然後行去Warorot Market, 好似香港的舊區, 我哋冇行到去佢個三層高的market, 所以又係冇乜特別。

幾年前去清邁去過awana做按摩, 非常懷念, 時間尚早, 專登過去試下做按摩, 點知full晒...

so sad...

於是搵另一間Lila按下膊頭, 我個膊頭係用來擔泥的...

好過昨日...

之後搭車過night market食平安夜大餐。

平安夜喺香港食一餐西餐大餐都要過千, 但喺清邁只係二百幾, 抵到喊!

順帶一提, 喺夜市內一檔賣椰子雪糕的小檔真係堅好味, 後悔冇影相...

23-12-2013 舊城區寺廟遊

今朝9點起身, 梳洗完出去食早餐。

上次去清邁, 實在太愛Sailomjoy的mango pancake, 今朝專登再去食, 水準依舊! 嚟多杯mocha, 好有聖誕氣氛呀!

食飽就開始喺舊城區參觀寺廟, 基本上見到有寺廟都衝入去睇, 而舊城區的寺廟數量驚人, 基本上總有一間喺左近。

早上的路程如下 :
Wat Phan On--Wat Sum Pow--Lanna Architecture Center--Wat Pan Tao--Wat Che Di Luang Vapraviharn

Wat Phan On

Wat Pan Tao

Wat Che Di Luang Vapraviharn

其實我對建築毫無認識, 所以都只係志在見識。

行咗一朝寺廟, 返酒店抖一陣, 然後出去食個午飯跟住再睇其他寺廟。

求其走入一間餐館食咗個好有喜感的飯

下午的行程如下 :
Wat Phrasingha--女子監獄--Wat Inthakhin Saduemuang--Wat Duang Dee--Wat Umongmahaterachan--Wat Pan Ping

Wat Phrasingha

Wat Phrasingha門口

在Wat Phrasingha門口有幾個小檔, 其中一個係由盲人學生負責整D小手工藝品義賣, 賺到的錢係用來捐助呢批盲人學生, 所以都買咗少少做手信。

之前睇lonely planet有介紹女子監獄, 話係一班在囚女犯人會幫人按摩, 賺到的錢監獄方面會幫佢地儲起, 等佢地出獄時有得用之餘更有一技之長, 所以專登行去睇下, 不過是日full了, 而且呢個女子監獄同我想像中差別太大了。