29-9-2013 首次去峇里

東南亞地區好多都曾經去過一兩個城市, 除咗印尼。

曾經有段時間印尼排華所以唔敢去, 至於峇里, 因為一直唔係十分之熱衷陽光與海灘, 所以一路都冇諗過會去。

不過見紅日機票平, 所以試下踏足呢個未去過的國家。

搭EVA AIR經台北飛峇里, 香港時間七點幾上機, 由於少少DELAY, 去到峇里下晝四點幾, OK啦。

順帶一提, EVA真係一間好好的航空公司, 比起香港的龍頭大哥的服務真係好太多。

一去到峇里, 先換錢先, 又開始幾十萬幾百萬咁的生活...

搭的士去今次住的酒店, 去峇里前知道峇里分幾個區分, 最旺係Kuta, 旁邊係Seminyak同Jimbaran, Ubud區離機場要1個鐘車程, 因為時間不多, 所以今次選擇住近機場的Seminyak區, 下塌Ping Hotel。

welcoming drink

Ping Hotel

由酒店去沙灘約10分鐘步行路程, 酒店旁邊好多食市, 隔離有間超市, 都幾方便, 而且Seminyak區都算靜, 感覺不錯。

酒店check in後出去行吓先, 由酒店行去沙灘吹吓海風都唔錯喎。

Seminyak對出的海真係好大浪, 根本唔適合游水, 我哋行咗一陣沙灘就喺沙灘旁搵間餐廳食晚飯。

Seminyak beach

吹住海風食燒魚, 認真不錯, 呢度的椰青真係好大個, 成個頭咁大, 正正正!!!

食飽, 返酒店抖一陣, 然後再出去行吓, 喺酒店附近搵咗間舖頭食漢堡包同飲mocktail, 哈哈哈哈....

第一日冇乜節目之下就結束了。

16-9-2013 金沙城見史力加

訓到都算自然醒, 然後起身去附近的餐廳食早餐。

其實我覺得澳門物價真係好貴, 個早餐都要廿幾蚊...

食飽, 返酒店執野, 然後搭車去金沙城睇下。

金沙城

去到金沙城, 竟然突然見到史力加兩公婆, 雖然我冇睇過呢套卡通, 但我都係衝過去同佢哋影相。

唔記得影史力加獨照...

嘩哈哈哈......

睇完史力加, 入賭場行一個圈, 然後搭車去官也街。

次次去澳門都冇食過葡國菜, 所以今日竟然係食木偶。

木偶

老實講, 我唔覺得好味到不得了, 或許葡國菜並唔係我杯茶。

牛仔肉

食飽飽, 喺官也街行咗一陣, 官也街而家竟然開左台北間蜂大咖啡, 近日迷上咖啡, 所以我都喺蜂大買咗一包細的咖啡豆返屋企沖來飲。

買完野, 搭銀河的shuttle bus去銀行準備轉shuttle bus去碼頭搭船返香港。

兩日一夜澳門之旅就此結束了。

15-9-2013 儲文化遺產

由於澳門酒店越來越五光十色, 價錢越來越貴, 所以我都好耐冇去過澳門了, 不過近日好想休息一下, 於是決定去澳門行下。

本來買左12點鐘的船票, 不過去到話11:30有位, 咁就早左去澳門, 去到酒店1:30。

今次唔係住大型賭場的酒店, 選擇較平的皇都, 因為我今次去澳門的目的係休息。

去到酒店未有房, 寄存行李之後去附近行下, 喺雀仔圃街市食晏, 食飽, 搭18號巴士去媽閣廟收集世界遺產。

咖哩雞麵

去過澳門幾次, 但今次係第一次去媽閣廟, 比起大三巴, 媽閣廟算係比較少人, 感覺亦比較舒服。

媽閣廟

在媽閣廟行一個圈, 然後行去阿婆井前地, 呢個前地係睇周圍的建築, 個人認為唔算太特別, 再睇睇地圖, 見到鄭氏大宅就喺附近, 所以又去行下。

阿婆井前地

一個老大屋, 聽到遊人話似七十二家房客, 由於我的歷史一般兼未睇過呢套戲, 所以感覺不大。

鄭氏大宅

去埋鄭氏大宅, 澳門的世界遺產我都差不多去過晒, 而家只剩下兩個, 下次有機會會再去, 咁澳門就會成為唯一一個我去齊晒佢的世界遺產的城市。

睇完遺產返酒店休息一陣, 然後去新葡京食自助餐。

冇生蠔食, 不過都幾多款式, 價錢可以接受, 但只係得2個鐘食, 好似有D趕。

食飽就去賭場睇人賭, 睇咗一陣準備去大三巴, 點知突然係咁流鼻血, 流咗成十分鐘都止唔到鼻血, 所以決定返酒店休息一陣。

點知一踏出新葡京門口就止血了, 真邪。(哈)

不過都返一返酒店整理一下, 然後去大三巴影夜景, 都幾靚喎。

大三巴

影完相搭的士返酒店休息了。

14-10-2013 又買石頭?

今早約左教授8:30a.m.去愛群大廈飲早茶。

其實我地已經8點鐘出門口, 不過截唔到的士加上搭巴士塞車的情況之下我地遲左5分鐘先到, 教授竟然已經坐喺門口等我地...

真係唔好意思呢...

兩個鐘頭聚舊真係唔夠, 不過我地今日時間唔多, 同教授傾計期間佢提到叫我地可以買砭石養生, 咁作為一個聽教的學生(笑), 我地當然即刻去買啦。

食飽早餐後去再行去萬菱行下, 然後返酒店check out, 按教授所教, 去五羊城站B出口的同仁堂專櫃買砭石。

買左一塊刮痧板加一條手鏈, 朋友又買咗條手鏈就走了... 同伴單買石頭都買左近千元, 我估佢應該唔會返到香港(笑)。

我今日下晝會返香港, 朋友自己會留多日喺廣州, 我諗住搭3點半班直通車返香港, 咁諗住大約2點走就啱啱去, 重有成個鐘, 我地去左五羊城隔離的珠江新城站睇下有乜睇。

原來一出地鐵就見到小蠻腰, 珠江新城係一個銀行商業區, 向住小蠻腰的方向會見到大劇院同海心沙, 記得上一次去廣州由小蠻腰見到海心沙都幾靚, 不過近看反而覺得一般。

小蠻腰

廣州大劇院

海心沙

差不多兩點, 唔夠時間去第二度, 於是早D去火車站睇下有乜行或者坐低食下野啦, 同朋友分開了, 我去火車站佢返酒店。

好快去到火車站, 一出閘見到有個AEON的商場, 心諗尚有時間咁就行下啦, 喺超市買咗幾盒百力滋就去買火車票返香港。

點知... 晴天霹靂呀, 最早的火車返香港係夜晚九點半, 我拎住好多野想而家返香港喎, 唯有即刻衝去買和諧號車票落深圳過關啦, 和諧號的車都幾密, 唔錯。

不過票價都唔平, 79.5人仔呀!!! 由羅湖返香港要34.4, 就返都要港紙140, 直通車只要190, 而且唔駛喺羅湖逼過關咁恐怖囉...

好辛苦地過關, 2日1夜廣州之旅結束了。

13-10-2013 廣州買水晶?

好耐冇去廣州了, 今日襯重陽假期約左個朋友上廣州玩兩日兼探望大學時期的教授。

搭10:52a.m.的直通車上廣州, 去到廣州酒店都已經下晝兩點, 今次住在沙面, 貪佢環境靚, 上網見勝利賓館好似幾吸引, 而且唔算太貴, 所以今次住喺呢區。

沙面雕塑

先去酒店放低行李, 然後出去行了, 沙面有好多外國的建築, 而且好多都係有好多年歷史, 清朝已經喺度, 不過幸好呢區未係文化遺產, 因為已申遺的國內景點吸引力會按倍數咁減低。

好靚的星巴克

影完相, 去一德路睇石室教堂, 期間求其喺一德路附近食下什茶, 8蚊人仔豬腸粉連熱檸茶, 抵。

其實我上過廣州都好多次, 但偏偏未去過石室教堂, 今日剛巧有彌撒, 入唔到去參觀, 不過石室教堂確實幾靚, 下次有機會一定要再去。

石室教堂

去到石室到此一遊後, 繼續行一陣一德路的萬菱批發廣場, 然後行去上下九的荔灣廣場, 記得之前去廣州都有去過荔灣廣場, 不過當年對水晶冇乜興趣, 又唔識買玉石, 所以行左一個就走, 剛巧近日突然有興趣研究下水晶, 加上同行者都玩左好幾年水晶, 所以一齊行荔灣廣場尋寶。

本來我想買條紫水晶手鏈同白晶簇, 同行者話陪我去睇水晶, 結果同行者竟然買水晶都買左七百幾, 而我就買左條月亮石。

題外話, 月亮石真係好靚。

同伴買到破產, 我地繼續喺上下九行街, 買左少少蓮香樓的餅, 食左個甜到爆的南信雙皮奶, 就展開上下九之尋找陳村粉的故事, 記得之前廣州人話度度都有得食陳村粉, 但我喺上下九真係搵唔到囉, 搵到有一間餐牌話有, 但坐低叫野食時佢話冇, 唉...... 我去廣州其中一個目的係食陳村粉架...

結果, 乜都冇食就返酒店了...

喺酒店下面間7-11買左少少餅乾就回酒店休息了...